உலகம் செய்திகள்

சீனாவில் 60 ஆண்டுகளில் இல்லாத கனமழை 12 பேர் பலி

22 Jun 2022

சீனாவின் தெற்கு பகுதியில் அமைந்துள்ள பல மாகாணங்களில் கடந்த சனிக்கிழமை முதல் கனமழை பெய்து வருகிறது. இந்த கனமழையால் 6 மாகாணங்கள் கடுமையாக பாதிக்கப்பட்டுள்ளன. குறிப்பாக ஹெனான் மாகாணம் மிகவும் மோசமான பாதிப்புகளை சந்தித்துள்ளது.

அந்த மாகாணத்தின் தலைநகர் ஜெங்சோவில் கடந்த சனிக்கிழமை இரவு 8 மணி முதல் நேற்று இரவு 8 மணி வரையில் 61.71 செ.மீ. மழை பெய்ததாக தெரிவிக்கப்பட்டுள்ளது.

இதன் மூலம் சீனாவில் கடந்த 60 ஆண்டுகளில் இல்லாத அளவுக்கு அதிக அளவில் மழை பெய்துள்ளதாக தெரிவித்த வானிலை அதிகாரிகள் மழை இன்னும் சில நாட்களுக்கு தொடரும் எனவும் எச்சரித்துள்ளனர்.

இந்த கனமழையின் காரணமாக தெற்கு சீனாவில் உள்ள ஆறுகள் மற்றும் ஏரிகளில் கடும் வெள்ளப்பெருக்கு ஏற்பட்டு ஊர்களுக்குள் வெள்ளம் புகுந்தது. இதில் நூற்றுக்கணக்கான வீடுகள் வெள்ளத்தில் மூழ்கின.

கரைபுரண்டோடும் வெள்ளத்தில் சாலைகள், பாலங்கள் மற்றும் ரெயில் தண்டவாளங்கள் அடித்துச் செல்லப்பட்டன. இதனால் அங்குள்ள பல நகரங்களில் சாலை மற்றும் ரெயில் போக்குவரத்து முடங்கியுள்ளன.

மேலும் கனமழை மற்றும் வெள்ளம் காரணமாக மின்சாரம், தகவல் தொடர்பு உள்ளிட்டவையும் துண்டிக்கப்பட்டுள்ளதால் மக்களின் இயல்பு வாழ்க்கை பெரிதும் பாதிக்கப்பட்டுள்ளது.

கனமழை, வெள்ளத்தை தொடர்ந்து ஹெனான் உள்ளிட்ட பல மாகாணங்களில் பயங்கர நிலச்சரிவு ஏற்பட்டது. இதில் ஏராளமான வீடுகள் மண்ணோடு மண்ணாக புதைந்தன.

இதனிடையே இந்த கனமழைக்கு இதுவரை 12 பேர் உயிரிழந்ததாகவும், 1.77 லட்சம் பேர் பாதிக்கப்பட்டுள்ளதாகவும் அதிகாரிகள் தெரிவித்தனர்.

மழை, வெள்ளம் பாதித்துள்ள பகுதிகளில் மீட்பு குழுவினர் குவிக்கப்பட்டு முழு வீச்சில் மீட்பு பணிகள் நடைபெற்று வருவதாக அங்கிருந்து வரும் தகவல்கள் தெரிவிக்கின்றன.

மேலும் தென் சீன பகுதிகளில் இன்னும் சில நாட்கள் மழை பெய்யும் என்று வானிலை மையம் அறிவித்துள்ளதால் பாதுகாப்பு ஏற்பாடுகளை அரசு தீவிரப்படுத்தியுள்ளது.


 






கருத்துரைகள்


கருத்துரைகள் இல்லை


 

தொடர்புடைய செய்திகள்


Powered by Jasper Roberts - Inayam